Den lokale popstjerna Anna Lille er tilbake på Malakoff – denne gongen på den store Malakoffscena! Etter ei sterk konsertoppleving på amfiscena i 2024, er ho no klar for å ta heimepublikummet med storm i 2026.
Anna Lille har allereie blitt samanlikna med girl in red og AURORA, og står i starten av ei lovande karriere. Med vare, ærlege tekstar og ein stemme som går rett under huda, har ho kapra hjarta til lyttarar både i Noreg og internasjonalt sidan debutsingelen «Stealing the Scene». Musikken hennar kombinerer ungdommeleg nerve med sterke melodiar og ein ektefølt singer-songwriter-stil.
Det siste året har ho markert seg som ein solid liveartist, med festivaljobbar på mellom anna Øyafestivalen, Vinjerock, RakettNatt og Jugendfest, samt som support for Bryan Adams i Ålesund. Ho opnar 2026 med opptreden på Eurosonic og er allereie klar for fleire store festivalar til sommaren – inkludert Malakoff.
Anna er òg aktuell med ein gripande coverlåt til spelefilmen «Min første kjærlighet», der ho tolkar ein Jahn Teigen-klassikar i ei moderne og kjenslefull drakt. For både Malakoff og Anna betyr denne konserten noko ekstra – ei ekte heimebaneoppleving du ikkje vil gå glipp av!
